Ingapan fichará alumnos relevantes de Procesos Químicos e Nutrición

Ingapan ofrece dous contratos de seis meses aos autores dos mellores traballos de fin de grao (TFG) de Enxeñería de Procesos Químicos Industriais e Nutrición e Dietética. Eses serán dous dos premios do I Concurso de Traballos Fin de Grao, no que tamén o Colexio de Enxeñeiros Técnicos Industriais de Lugo e a Asociación de Dietistas e Nutricionistas de Galicia (Adinu) gratificarán con 2.000 euros os mellores traballos da última promoción de graduados na facultade de Ciencias.

O decano, Francisco Fraga, presentou este mércores o certame, nun acto no que participaron tamén o decano do Colexio de Enxeñeiros Técnicos Industriais de Lugo, Jorge Rivera; a presidenta de Adinu, Sheila Castañar, e Ana Piñeiro, responsable de proxectos da empresa Ingapan.

A convocatoria está aberta ata o día 29, data límite ata a que o alumnado poderá presentar os traballos na Secretaría do centro universitario lucense.

DIñEIRO. O Colexio de Enxeñeiros Técnicos Industriais premiará con 1.000, 500 e 300 euros os autores dos tres traballos do grao de Enxeñería de Procesos Químicos Industriais máis valorados polos integrantes da comisión técnica externa que se ocuparán de levar a cabo a súa avaliación.

Do mesmo xeito, os mellores traballos de fin de grao de Nutrición Humana e Dietética tamén recibirán unha gratificación económica que, neste caso, correrá a cargo do colectivo de dietistas e nutricionistas Adinu.