O mozo que atracou a un taxista lucense a punta de pistola, hai xa dous anos, foi condenado a 25 anos de cárcere tras confesar polo menos catro asaltos en distintas provincias e acumular un total de dez delitos. As súas fechorías —coas que logrou un botín de pouco máis de 500 euros— custáronlle varias imputacións por roubo con intimidación, detención ilegal, coaccións, apropiación indebida, e tenza ilícita de armas, unha recua de acusacións que o levaron directo a prisión.
Aínda así, a lei establece que o máximo de cumprimento das penas é o triplo da condena maior, que neste caso é de catro anos por detención ilegal, polo que o acusado non poderá pasar máis de doce anos entre reixas.
Colleu un taxi na estación de autobuses e no traxecto ameazou o condutor, quen conseguiu desviarse ata unha gasolineira
A.B.G., de 29 anos e natural de Romanía, non tivo ningún reparo en recoñecer os feitos. O mozo confesou que o 20 de abril de 2017, sobre as dez da noite, subiu a un taxi na estación de autobuses de Lugo e pediulle ao condutor que o levase ata Vilalba. O taxista púxose en camiño e, á altura de Rábade, cando ía coller o desvío cara á estrada que leva á capital chairega, o pasaxeiro colocoulle no pescozo unha arma de fogo e obrigouno a seguir pola A-6 en dirección á Coruña.
O home colocouse xusto detrás do asento do condutor e obrigouno a mover o espello retrovisor para que non puidese verlle a cara nin observar o que facía. Durante o traxecto, o home pediulle o moedeiro, que o condutor lle entregou, no que había menos de cen euros. O taxista fixo o que lle pedía o home e incluso intentou entretelo dándolle conversación, pero o delincuente replicoulle que desde ese momento era el o que daba as indicacións.
O acusado non poderá cumprir máis de doce anos de prisión, o triplo da condena maior, que foi de catro anos por detención ilegal
Á altura de Guitiriz, o taxista optou por tomar unha decisión arriscada para intentar buscar unha zona onde puidese haber xente. Así, achegouse á saída da autovía cara á área de servizo e, ao chegar á vía de acceso á zona de descanso e reposición, deu un volantazo brusco que tomou totalmente por sorpresa ao atracador, quen lle preguntou: "¡¿Que fas?! ¡¿Que fas?!" e lanzouse fóra do coche cando o vehículo nin sequera parara a marcha. Nese momento, ao redor das dez e media da noite, había bastante xente na área de servizo porque se atopaban parados varios autobuses de excursións, o que facilitou a fuxida do home.
Antes dese día, o home xa cometera outros tres asaltos a taxistas, dous deles en Santiago de Compostela e outro en Oviedo, e tamén asumiu un roubo cometido no parque infantil de tráfico de León.
Finalmente, foi detido o 20 de abril de 2017 en Xixón con dúas armas no seu poder: unha pistola accionada por gas e outra pistola de descarga eléctrica.
