A escultura 'Peiteando o porvir', de Luís Loureira, forma parte desde onte da colección de obras artísticas do IES Sanxillao de Lugo. Esta escultura é a conmemoración do quinto premio Mariña Folgueira de Redacción Xornalística, convocado pola Asociación de veciños de Santiago de Reigosa, da Pastoriza. Este certame está dirixido a alumnos de primaria e secundaria da provincia de Lugo.
Na última edición o gañador foi David San Emeterio, do Sanxillao, na categoría de primeiro ciclo de Educación Secundaria, cunha narración titulada 'A nosa terra'.
Os gañadores deste premio sempre reciben un lote de libros e o centro no que estudan recibe unha peza escultórica coa que os organizadores e o propio autor da escultura queren contribuír a animar ao alumnado a continuar formándose.
