O servizo de Cardioloxía do Hula, coordinado por Carlos González Juanatey, e o grupo de Toxinas Mariñas da facultade de Veterinaria, dirixido polo catedrático de Farmacoloxía Luís Botana, describiron un novo marcador de enfermidade coronaria: a ciclofilina C, un tipo de proteína vinculada á inflamación. Aínda que se sabía que as ciclofilinas podían exercer un papel activo nas enfermidades ateroescleróticas (aquelas causadas pola acumulación de placas nas arterias) non se describiu antes como factor de risco un nivel elevado da C en concreto.
"Pode ser un biomarcador de enfermidade coronaria e, no futuro, tamén servir de diana terapéutica", explicou o doutor González Juanatey. é dicir, ademais de ser un elemento que indique o risco de ter unha desas patoloxías, poderían chegar a desenvolverse fármacos orientados a diminuír os niveis de ciclofilina C.
O artigo describindo o achado foi recentemente publicado na Scientific Reports. Trátase dunha megarrevista científica (nome que reciben as que publican máis de 100 artigos á semana) do mesmo grupo editorial de Nature.
Os dous equipos analizaron catro tipos de ciclofilinas (A, B, C e D) nun total de 84 pacientes, 40 deles con enfermidade aterosclerótica diagnosticada e 44, dentro do grupo de control, sen patoloxía coronaria coñecida e con probas de angiografía normais.
Atoparon que, nos primeiros, os niveis da ciclofilina A estaban significativamente elevados con respecto aos segundos, algo que xa esperaban porque a relación desa proteína en concreto coa enfermidade coronaria si fora descrita con anterioridade. O mesmo ocorreu coa B e, de igual forma, non sorprendeu aos investigadores. Con todo, tamén se deu coa C e, ademais, cando analizaron a capacidade desa ciclofilina para o diagnóstico da enfermidade coronaria acharon que era a que tiña unha maior sensibilidade de todas as analizadas.
González Juanatey cre que a ciclofilina C pode ser un marcador da enfermidade coronaria e tamén unha nova diana terapéutica
Por ese motivo, e porque tamén atoparon unha relación significativa entre os factores de risco clásicos de enfermidade coronaria (como o tabaquismo ou a hipertensión) e os niveis elevados de ciclofilina C, propoñen que se considere un novo biomarcador para esa patoloxía.
O proxecto, que inclúe tamén o estudo dos posibles efectos terapéuticos duns compostos de orixe mariña chamados gracilinas, obtivo financiamento por valor de 150.000 euros a cargo do Fondo de Investigacións Sanitarias.
O proxecto colaborativo entre Cardiología do Hula e o grupo de Toxinas Mariñas da facultade de Veterinaria da USC continuará, xa que acábase de confirmar o financiamento doutros 16.000 euros para os próximos 3 anos de forma que se poida facer unha extensión do estudo. Pola súa banda, o grupo que dirixe Luís Botana traballa tamén cun equipo estadounidense na análise do potencial inmunosupresor e contra o alzheimer.
