Os datos de coronavirus actualizados este xoves pola Consellería de Sanidade revelan un estancamento na cifra de casos activos na provincia de Lugo, que se mantén invariable nos 1.402 infectados. E é que, aínda que se detectaron 58 novos contaxios, esta cifra viuse compensada pola concesión de 57 altas a persoas que superaron a enfermidade. Ademais, faleceu un home de 64 anos que fora diagnosticado de covid-19, a terceira vítima mortal do brote da residencia das Gándaras
A información máis preocupante do balance facilitado polo Sergas —ata as 18.00 horas do mércores— é a relativa ao número de hospitalizados, xa que o Hula sumou cinco ingresados máis en 24 horas e o hospital da Mariña, outro. Así, sobe a 33 o total de pacientes covid en centros sanitarios da provincia, seis máis que na xornada precedente, dos que catro se atopan na unidade de coidados intensivos do Lucus Augusti (sen cambios), 24 en planta nese mesmo hospital (cinco máis), catro no de Burela (un máis) e un no de Monforte (sen variación).
O ritmo de detección de novos contaxios retárdase con respecto ao anterior parte de Sanidade, xa que os 58 positivos confirmados supoñen un significativo descenso fronte aos 76 do balance do mércores, aínda que seguen por encima dos 52 do martes.
Desde o inicio da pandemia curáronse un total de 17.636 pacientes covid na provincia e faleceron 244 persoas, aínda que o Sergas contabiliza 236 ao non sumar algúns dos pacientes lucenses falecidos noutras áreas. As últimas vítimas son tres usuarios da residencia das Gándaras.
GALICIA. Galicia deixou de estar en risco extremo por coronavirus, ao situarse por baixo dos 250 casos por cen mil habitantes a 14 días, con 248,95, e segue reducindo o número de persoas con covid-19 e o de hospitalizados, aínda que lixeiramente, mentres os contaxios chegan aos 334.
Segundo os datos do Sergas, hai nos hospitais galegos 206 enfermos de covid-19, dous menos que na xornada anterior. Deles, 153 están en planta, tres menos, e 53 na Uci, un máis.
A cifra dos ingresados nas unidades de críticos continúa sen baixar do mesmo xeito que a de falecidos, con catro máis nas últimas horas, ata un total de 2.574 desde o inicio da epidemia. Mantense, con todo, a redución constante de número de casos activos, con 290 menos nun día, ata os 7.522.
Respecto dos contaxios, foron un total de 334, cinco máis que o martes.
A curva descendente da quinta onda de contaxios en Galicia constátase na incidencia acumulada que está en 248,94 a catorce días, co que baixa de risco extremo a risco alto, aínda que aínda se mantén por encima da media estatal, de 221,76.
A taxa de positividade é do 7,65 % inferior á media española do 8,78 %, segundo os datos facilitados onte polo Ministerio de Sanidade.
Por áreas sanitarias, todas rexistran descensos de casos activos, excepto Lugo que se mantén igual, con 1.402. A da Coruña, que é a que ten máis pacientes con infección activa, está en 1.871 casos (-122); e a de Santiago de Compostela, con 1.309 (-8) xa se atopa por diante da de Vigo, que queda con 1.250 (-97). Despois están a de Ourense, con 679 (-16); Ferrol, con 507 (-22); e Pontevedra, con 504 (-25).
En Galicia, administráronse 4.124.258 dose da vacina contra a covid-19 e xa hai 2.070.868 persoas que contan coa inmunización completa.
A cifra de PCR realizadas na comunidade ascende a 2.752.676, das que 7.654 corresponden á última xornada, e fixéronse 793.621 test de antígenos e 1.097.314 doutras probas de detección.
