O proxecto Fame Cero, impulsado inicialmente polo cirurxián do Hula José Manuel Couselo, conseguiu reunir 3.250 destinados ao Banco de Alimentos de Lugo que serviron para comprar máis de cinco toneladas de produtos imperecederos como pasta e fariña.
A iniciativa xurdiu durante a primeira onda da pandemia, cando empezou a resultar evidente que, xunto á crise sanitaria, corría paralela unha evidente crise económica que estaba a pór ás familias máis vulnerables nunha situación límite. Naqueles primeiros días de desescalada as colas no Banco de Alimentos dicíano todo.
O doutor Couselo mobilizou aos seus compañeiros do servizo de Cirurxía e, co servizo de Humanización do hospital, púxose en marcha unha iniciativa de recadación de fondos que axudase a familias lucenses con problemas. Gloria Enríquez, responsable de Humanización, recordou que o proxecto acabou implicando a moita xente do hospital e destacou que finalmente a cantidade recadada permitiu entregar varios palés de pasta e fariña, fundamentalmente, que xa está nas instalacións do Banco de Alimentos para a súa repartición.
Tamén admitiu que esta pode ser a primeira fase da iniciativa, que moi probablemente se repita no futuro. "O obxectivo era achegar o noso gran de area fronte ás dificultades que moitas familias de Lugo están a pasar durante esta pandemia", asegurou.
O Hula acolleu onte unha entrega simbólica do cheque co recadado a Amadora Núñez, a directora do Banco de Alimentos de Lugo, nun acto ao que acudiron membros do servizo de Cirurxía, de Humanización e da xerencia do hospital.
