LUGO. A xornada de folga convocada -e desconvocada- onte en España pola Asociación de Examinadores de Tráfico (Asextra) contou en Lugo cun seguimento do 100%, segundo confirmou Mónica Pérez, presidenta da Asociación Provincial de Autoescolas de Lugo.
O paro de examinadores afectou a máis de corenta alumnos que tiñan prevista a xornada de onte para a realización dos seus exames prácticos. Con todo, á primeira hora da mañá, e segundo confirmou a propia presidenta da Asociación Provincial de Autoescolas, varios funcionarios non examinadores aínda que si capacitados para iso avaliaron a un grupo de alumnos da parte teórica. «O resto de probas previstas canceláronse pola folga», asegurou Mónica Pérez.
O colectivo de examinadores de tráfico tiña a intención de alargar a folga ata o próximo 21 de decembro en protesta por non cobrar a subida salarial aprobada nos Orzamentos Xerais do Estado para 2018. Este incremento de 250 euros en 14 pagas ao ano recolleuse nas contas estatais de 2018 grazas a un acordo inicial entre todos os grupos parlamentarios que provocou a desconvocatoria da folga que moitos funcionarios mantiveron de luns a mércores entre o 19 de xuño e o 13 de decembro do ano pasado.
«Queremos que o Goberno cumpra o acordado. Comprometéronse á subida salarial de 250 euros que non fixeron realidade nos orzamentos. Por iso volvemos protestar», apuntou Mónica Pérez.
«RUÍNA» PARA O SECTOR. A presidenta da Asociación Provincial de Autoescolas de Lugo fíxose eco das palabras do responsable de Asextra, Joaquín Jiménez, e asegurou que unha nova folga sería unha «ruína» para o sector.
«Aínda non remontamos economicamente das perdas que supuxo a situación o ano pasado e repetilo podería ser a estocada final para un sector que está a agonizar», lamentou Pérez.
DESCONVOCATORIA. Tras a reunión entre a DXT e o comité de folga, Asextra comunicou a última hora da tarde a desconvocatoria da folga grazas á mediación do director da DXT, Pere Navarro.
Na reunión acordouse que o acordo subscrito é unha «solución transitoria ata a consecución da modificación da RPT». Se non se logra no primeiro semestre de 2019, haberá un novo paro.
