Os EXPROPIETARIOS do bar Anda, José Luis Puga e Mari Carmen Veiga,recibiron o luns unha calorosa homenaxe por parte dos hostaleiros da Rúa da Cruz e de excompañeiros do restaurante Verruga onde José Luís traballou como camareiro anos antes de converterse en empresario co bar Anda.
O acto resultou moi emotivo, dado que deu pé ao recordo de numerosas anécdotas xurdidas ao longo dos 33 anos que a parella estivo á fronte do bar Anda, establecemento no que botaron o peche o pasado mes de outubro, debido á súa xubilación, e que agora está á espera de reabrir cunha nova xerencia, que correrá a cargo dos donos do Bulló Xantar, que se atopa a poucos metros de distancia, tamén na Rúa da Cruz.
Os novos responsables están a reformar o establecemento e manterán o seu nome. José Luis e Mari Carmen sentiron moita pena por deixar o negocio, especialmente pola clientela que mantiveron durante eses anos que estiveron á fronte do bar, pero era tempo de xubilarse. A parella dedicou ao Anda unha media de dez a catorce horas diarias os sete días da semana, converténdose na súa segunda casa.
A excelente reputación do negocio e a súa extensa carteira de clientes púxollo especialmente difícil á parella á hora de decidirse polo candidato ideal para o traspaso do negocio, no que chegaron a recibir ata seis ofertas.
José Luis Puga, que exercía de xefe de comedor, e Mari Carmen Veiga, de cociñeira, desembarcaron no Anda en 1985. Él estivera vinte anos na Verruga. ela era perito mercantil e estreábase entre os fogóns convertendo en restaurante o mítico bar, que entón vendía un barril diario de 60 litros de ribeiro branco.
