Lugo estreou este sábado as novas restricións establecidas para os negocios de hostalería ante a evolución da pandemia de coronavirus. Así, para consumir no interior de bares ou restaurantes é obrigatorio presentar un certificado de vacinación, un xustificante de resultado negativo nunha proba de covid con menos de 72 horas de antigüidade ou un documento que acredite que se pasou a enfermidade.
Coa entrada en vigor das novas medidas acordadas esta semana polo comité clínico as sete principais cidades galegas teñen pechado o lecer nocturno e aplican os mesmos requisitos de acceso na hostalería, co aforamento limitado ao 50% en interior e en exterior. Ocorre igual, na provincia de Lugo, en Cervo, Ribadeo, Monforte e Chantada. Tamén se require certificado en Foz, Viveiro, Burela e Monterroso, que están no nivel máximo de restricións.
A estas medidas súmase a prohibición de reunións de non conviventes entre a 1.00 e as 6.00 da madrugada, así como a limitación, en toda a comunidade autónoma, do número de persoas que se poden reunir en espazos públicos ou privados —seis en interiores e dez, en exteriores— durante o resto do día.
As restricións entran en vigor tras o aval outorgado este venres polo Tribunal Superior de Xustiza de Galicia (TSXG), que, en base ao informe técnico remitido polo Executivo galego, considerou "necesarias" e "proporcionadas" as medidas, "que responden a un incremento na transmisión do virus".
Máis información: Máis do 65% dos lucenses afrontarán restricións dos niveis alto e máximo
NIVEL ALTO. No nivel alto atópanse actualmente 41 municipios de toda a comunidade. Son Carballo, Arteixo, Fisterra, Oleiros, Arzúa, Agarimo, Melide, Ribeira, A Coruña, Cambre, Culleredo, Ames, Santiago de Compostela, Ferrol, As Pontes, Ortigueira e A Pobra, na Coruña; e Cervo, Ribadeo, Monforte, Lugo, Chantada, en Lugo.
Na provincia pontevedresa son A Illa, Marín, Poio, Soutomaior, Pontevedra, Vilagarcía, Vilanova, Gondomar, Vigo, Bueu, Ponte Caldelas, A Guarda, Meis, Moaña, Mos, O Porriño, Redondela, Nigrán, Tomiño, Ribadumia; mentres que de Ourense atópanse en nivel alto Avión, O Rosal, Barbadás, O Carballiño, Ourense e Verín.
NIVEL MÁXIMO. Ademais, desde este sábado sitúanse no nivel máximo 12 municipios: Boiro e Muros, na Coruña; Cambados, Meaño, O Grove, Sanxenxo e Baiona en Pontevedra; Foz, Viveiro, Burela e Monterroso, en Lugo; e O Barco, en Ourense.
Alí tamén se esixen certificados de covid-19 para acceder ao interior de locais de hostalería, cuxo aforamento está limitado ao 30% dentro e ao 50% en exteriores.