O presidente da Asociación Provincial de Empresarios de Hostalería e Turismo de Lugo, Cheché Real, recoñeceu que a apertura parcial dos establecementos a partir desta media noite é "unha medida absolutamente insuficiente", porque nin sequera se lles permitise aos establecementos "traballar a medio gas".
"Hai moita xente que ten ganas de abrir, que traballa nesa franxa horaria e á que lle pode vir ben, pero á maioría dos establecementos esta apertura non os saca do pozo no que están metidos", queixouse Real.
De feito, recordou que agora os propietarios dos establecementos terán que realizar unha "selección entre o seu propio persoal", de modo que terán que "sacar a algúns traballadores dos Erte, pero a outros non", porque "o 100% do persoal non pode traballar". Ao seu xuízo, é "unha medida absolutamente insuficiente, porque non é traballar a medio gas. É moito menos".
Recoñece, en todo caso, que pode ser "un primeiro paso" e que o sector mantén "a esperanza" de poder "traballar nunha porcentaxe máis alta a próxima semana", sempre que a situación epidemiolóxica mellore.
