O hospital veterinario universitario Rof Codina podería empezar a atender consultas tamén polas tardes a partir do mes de marzo, segundo indicou o seu xerente, Luis Felipe de la Cruz Palomino, quen aclarou que esta medida dependerá das posibilidades de contratar persoal para asumir a carga de traballo que suporía ampliar o horario.
O incremento das horas de consulta é unha das suxestións que se recollen no informe que realizou o comité avaliador da Asociación Europea de Establecementos de Educación Veterinaria -EAEVE, nas súas siglas en inglés- que considera que as instalacións están "infrautilizadas" cun horario unicamente matutino. Pola súa banda, o xerente do hospital apunta que, en realidade, era un obxectivo que xa se marcaron independentemente da indicación da EAEVE, pero que antes da reforma que se fixo no hospital non era viable.
A EAEVE sinala que ampliar o horario permitiría incrementar as horas de formación clínica dos graduados, dado que unha das cuestións que sinala o informe de avaliación da facultade de Veterinaria é que o rotatorio clínico é un tempo escaso para permitir aos alumnos coñecer a fondo os casos e facer o seguimento posterior. De feito, o informe de avaliación suxire que se amplíe o programa, aínda que admite que, para facelo, o hospital debería estar aberto todo o día e non só pola mañá. Iso contribuiría a ter máis casuística, pero necesitaríase ter máis persoal especializado e máis pacientes.
O persoal, indicou De la Cruz Palomino, é precisamente "o pescozo de botella" que dificulta a ampliación. A fundación da que depende o hospital ten potestade para contratar facultativos se a Xunta a autoriza e estes poderían participar na docencia como profesores asociados. Tamén cabe a posibilidade de que o contrate a USC, pero entón deberían reunir unha característica a maiores, que é ter o doutoramento. En todo caso, incrementar o persoal dependerá das posibilidades de financiamento.
Estas cuestións dirimiranse na próxima reunión da comisión de seguimento integrada pola USC e a fundación. O xerente sinala que se trata dun hospital universitario e, polo tanto, sempre se prioriza o acto clínico coa presenza de alumnado e tutelados por persoal docente, xa sexan asociados ou doutores.
