Paulo Fabio Maximo, fundador de Lucus Augusti, é este ano o protagonista da moeda de Arde Lucus. Trátase dun sextercio e pono á venda a partir deste mércores a Cohors III Lucensium, ao prezo de dous euros.
No ano no que o Arde Lucus renace tras a pandemia, a asociación apostou por lanzar unha copia da única moeda dedicada ao fundador de Lucus Augusti que se coñece. Trátase dunha peza conmemorativa, acuñada entre os anos 10 e 11 antes de Cristo, cando Paulo Fabio Maximo foi nomeado gobernador de Hierápolis, na actual Turquía.
No anverso da moeda aparece o busto de Paulo Fabio Máximo, co seu nome en grego, e no reverso figura gravada unha machada de dobre folla.
A Cohors III Lucensium lanzará 3.000 unidades da moeda, practicamente a metade que en edicións anteriores da festa, e a venda do sextercio servirá para financiar iniciativas deste próximo Arde Lucus, no que se recuperará xa a actividade de rúa, aínda que seguirá habendo actos telemáticos.
A idea é que en cada campamento as asociacións organicen actividades que sirvan para dar a coñecer como era a vida dos antigos romanos e castrexos
O programa está aínda lonxe de pecharse, pero se contempla que haxa algúns desfiles nas rúas e, sobre todo, moitas actividades nos campamentos da preto de vintena de asociacións de recreación histórica.
A idea é que, seguindo protocolos de seguridade, en cada campamento as asociacións organicen actividades que sirvan para dar a coñecer como era a vida dos antigos romanos e castrexos.
A esa divulgación tamén contribúe a moeda da Cohors III Lucensium, xa que servirá para profundar na figura do fundador de Lucus Augusti, un personaxe cunha vida apaixonante.
Así, por exemplo, o primeiro cargo público do fundador de Lugo foi, no 22 antes de Cristo, o de cuestor, maxistrado relacionado coa recadación de impostos. No 16 antes de Cristo casou con Marcia, filla do consul Lucio Marco e cinco anos despois foi nomeado gobernador de Hierópolis, onde os colonos erixiron un monumento na súa honra.
Dese posto na actual Turquía chegou á península como gobernador da Hispania Citerior, cargo desde o que impulsou a fundación de Lucus Augusti. Posteriormente caeu en desgraza co emperador e suicidouse.
