Non lles querían expropiar un barco, como a Chanquete, senón ocupar unha leira que, segundo eles, ten unha servidume. Por este motivo, e como na mítica escena da televisiva serie Verán Azul, dous veciños da parroquia de Pedreda, pai e fillo, protagonizaron o seu particular "Non nos moverán" tirándose no chan diante dun tractor. Os dous parentes mostráronse firmes no seu empeño, ata o punto de que tivo que intervir a Policía Local para levantalos
O altercado produciuse na tarde do pasado sábado, cando a sala do 092 recibiu unha chamada solicitando a presenza dunha patrulla no barrio de Outeiro, na mencionada parroquia, que pertence ao municipio de Lugo.
Cando chegaron ao lugar, os axentes comprobaron que había un tractor e un apeiro de labranza, concretamente un rulo, obstaculizando o paso nun camiño público. O propietario do vehículo pretendía acceder a unha leira particular, pero non podía facelo porque dous veciños obstaculizábanlle o paso.
Os axentes tiveron que intervir varias veces nos últimos seis meses polo pulso entre dúas familias polo paso dunha leira
"Estas dúas persoas", explicou o portavoz policial, "estaban tiradas diante do tractor, impedindo a circulación do vehículo, e manifestaron que o terreo era da súa propiedade e que un veciño quería colocar un rulo nese lugar".
Os axentes da unidade territorial de Policía de Barrio tiveron que "levantar" do chan a pai e fillo e abriron dilixencias por este incidente, que foron remitidas ao xulgado de garda.
CHOVE SOBRE MOLLADO. Non é a primeira vez que a Policía Local ha tido que mediar no preito que manteñen estes veciños. Nos últimos seis meses as discusións foron frecuentes, aínda que nunca chegaron a pasar das palabras ás mans.
En Outeiro só hai cinco casas habitadas e as familias de dúas delas son as que manteñen este pulso por uns lindes.
Contan os veciños de Pedreda, que o problema xurdiu cando un dos afectados adquiriu unha leira próxima a unha casa que acaba de restaurar. Entón iniciou as obras para instalar un muro de peche.
A outra familia, segundo a versión dos veciños, considera que non pode pechar a parcela e que ten que deixar unha servidume de paso para que poidan acceder á fonte dunha leira súa.
