Os seus amigos e Aspnais, a asociación que ela puxo en marcha, quixeron este xoves dicirlle a Conchita Teijeiro o moito que a querían e o importante que foi nas súas vidas. E conseguírono. O salón de Afundación encheuse de xente para aplaudir e sumarse a esa homenaxe que, desde o estrado, quíxolle facer Aspnais a través de amigos como o locutor Paco Rivera e a expresidenta da asociación Concepción Arenal, Marina Cillero; a directiva de Aspnais, da man do seu actual presidente, José Reigosa; e a secretaria xeral, Carmela González, e tamén o fillo maior de Conchita, Bernardino Pardo, en nome da familia.
Cada cal fixo o seu retrato de Conchita pero todos eles coincidiron en adxectivos como alegre, entregada e negociadora, "sablista", engadiu Paco Rivera. "A única que lle gañou a Currinche", engadiu. "Sacáballe o diñeiro a calquera para a asociación e o que llo daba, quedaba encantado, o que aínda é máis raro", continuou.
Paco Rivera recordou que hai xa quince anos pedira ao Concello que lle dese o nome de Conchita Teijeiro a unha rúa e volveuse a facer eco da solicitude, á que se sumou Marina Cillero dicindo: "Isto non é política, nin memoria. Isto é xustiza", e o público respondeu cun sonoro aplauso.
Marina Cillero destacou que Conchita demostrou, xa viúva do xinecólogo Bernardino Pardo Ouro e na súa loita por Aspnais, que "sempre quixo ser ela e nunca dixo son señora de... cando aínda as mulleres viviamos á sombra dos maridos".
Carmela González afirmou que Conchita sempre inxectou alegría en Aspnais, onde "era a confidente de todos" e José Reigosa engadiu que a súa predecesora fora non só a cabeza visible senón tamén "ou corazón de Aspnais".
O seu fillo maior, Bernardino Pardo, destacou da súa nai a súa faceta de "meiga vedoeira, que ve máis aló, e de doa do castro porque a xente recibía algo dela a cambio de nada".
O acto terminou cunhas palabras de agradecemento de Conchita. "Sempre levarei no corazón a cada un de vós e aos meus nenos de Aspnais", dixo.
Homenaxeada Conchita Teijeiro, "a alma e o corazón" de Aspnais
O traballo da fundadora da asociación foi recoñecido nun acto no que se pediu que Lugo lle dedique unha rúa
