Galicia e Perú déronse este martes a man na capital lucense co obxectivo de compartir experiencias e coñecementos sobre o sector agrario e as súas posibilidades de desenvolvemento. Representantes da Asociación Jesús Obrero (Ccaijo) e do Servizo Agropecuario para a Investigación e Promoción Económica de Perú (Saipe) intercambiaron impresións cos seus homólogos das ONGs Taller de Solidariedade, impulsada polas Servas de San José, e Entreculturas. Este proxecto de cooperación conta tamén co apoio da Xunta de Galicia, representada por Ramón Carballo.
O director de Ccaijo, Luis Casallo, explicou o traballo que realizan con 189 produtores rurais para superar a pobreza e a exclusión da poboación na provincia de Quispicanchi, na Serra Andina. "Intentamos que familias campesiñas se incorporen ao mercado en sectores como a produción de leite ou a gastronomía rural, para mellorar as súas condicións de vida", apuntou.
Os asistentes degustaron pratos típicos peruanos elaborados con produtos galegos polo Chef Alvaro Villasante
Pola súa banda, o coordinador de Saipe, Leonardo Ujukam, disertou sobre un proxecto desenvolvido na selva amazónica que se centra no manexo sostible dos recursos naturais agropecuarios. "Esta iniciativa", explicou, "beneficiou xa a máis de 2.400 acodes grazas á aprendizaxe de novas técnicas para exercer menos presión sobre os bosques e mellorar os seus chans para a agricultura".
Ademais de intercambiar experiencias, lucenses e peruanos compartiron mesa e mantel no restaurante Paprica, onde o chef Álvaro Villasante preparou suculentas receitas peruanas con produtos galegos. O menú, a base de brochetas de pito e fígado, quinoa con leite e plátano asado con xeado de mel e lima, non deixou indiferente aos comensais. Os pratos triunfaron, a solidariedade tamén.
