Os salóns de automoción non se poden celebrar en Galicia nun único recinto debido ás restricións establecidas polas autoridades sanitarias pola pandemia, polo que oito grupos do sector se alían para organizar un evento común nas súas instalacións da capital lucense. Os próximos días 17, 18 e 19, coincidindo co Arde Lucus, ofrecerán en total máis de 1.000 vehículos novos, seminovos, quilómetro 0 e de ocasión con atractivos descontos.
Os participantes, que son distribuidores oficiais de máis dunha vintena de marcas automobilísticas, son Grupo Breogán, Pérez Rumbao, Grupo Ditram, Roysan-Acea Móbil, L-Motor, Grupo Pardo Automoción, Autogándara e Renting Credit.
"É un orgullo que empresas que se pode considerar que somos competencia nos unamos para facer un proxecto en común", afirmaba o xerente do Grupo Ditram, Rubén Gil, en la presentación de este evento xunto á concelleira de desenvolvemento local e emprego, Ana González Abelleira, pois o Concello de Lugo colabora así cun "dos sectores máis importantes" nesta provincia e que é "un máis dos que sufriu neste ano de pandemia", destacou a edil.
Os concesionarios participantes, que contan con case medio milleiro de traballadores e facturan uns 250 millóns de euros anuais, abrirán as súas portas ao público durante os tres días con motivo deste certame, denominado Gran Liquidación do Automóbil en Lugo, en horario ininterrompido de dez da mañá a oito da tarde.
OBXECTIVOS. Rubén Gil indicou que o obxectivo que se fixan é que cada concesionario comercialice polo menos dez vehículos neste evento. O xerente do Grupo Ditram sinalou que as vendas actuais son un 15% inferiores ao ano 2019, antes da pandemia. Os meses de xaneiro e febreiro foron os peores para o sector das últimas tres décadas.
Este empresario destacou que se está producindo "unha tormenta perfecta" porque ás consecuencias do covid-19 súmase a escaseza de chips semiconductores, un problema de produción que é común a outros sectores.
Ás "ofertas inmellorables" dos concesionarios súmase a existencia de plans "moi atractivos" do Goberno para adquirir vehículos eléctricos, segundo destacou Rubén Gil, co "fin de reducir o nivel de emisións para favorecer o medio ambiente e combater o cambio climático".
