LUGO. A xunta de goberno local ten previsto iniciar este mércores un procedemento negociado sen publicidade para tratar de buscar unha empresa que se faga cargo da xestión do guindastre municipal. O executivo adoptará esta medida logo de quedar deserto en febreiro pasado o concurso para readjudicar esta concesión, que se viu envolvida na polémica ao ser un dos contratos municipais investigados no marco da operación Pokemon.
De feito, que a lupa xudicial estea desde hai anos sobre esta concesión puido influír na circunstancia de que ningunha empresa mostre interese por facerse coa xestión do guindastre, a pesar de que o Concello ofrece pagar 540.000 euros ao ano á firma que se faga coa concesión, unha cantidade que se mantén no novo procedemento negociado.
O custo deste contrato é considerado excesivo polos grupos da oposición e desde o PP recordábase o mércores que xera un déficit anual de case medio millón de euros ao ano, dado que apenas se recadan uns 50.000 euros por retiradas de vehículos da vía pública. Con todo, desde o goberno local replícase que se trata dun servizo que é obrigatorio prestar a pesar de que non sexa rendible economicamente.
A pesar diso, o viceportavoz popular Enrique Rozas apuntaba o martes que o custo do guindastre municipal podería reducirse remunicipalizando o servizo e aplicando desta forma o acordo plenario de 2016 que instaba o Concello a recuperar a xestión, polo que cualificaba de «provocación» que o goberno local opte por readjudicar o servizo a unha empresa.
«Con esta manobra Lara Méndez confirma a súa falta de respecto á hora de acatar acordos de pleno, cando ten na súa man a solución e o apoio político para levala a cabo», comenta Rozas.Pola súa banda, o goberno local apunta que esta nova licitación do guindastre só busca «cumprir a lei e seguir coa folla de ruta que sempre explicou con respecto a este servizo: ir a un contrato ponte mentres se leva a cabo o expediente de municipalización».
