O goberno local decidiu iniciar un novo proceso de selección para cubrir a praza de director da banda municipal de música e desistir do que tiña aberto e que fora cuestionado por informes técnicos e polos sindicatos.
O tenente de alcalde, Rubén Arroxo, daba conta este mércores desta decisión na rolda de prensa tras a xunta de goberno e dixo que desde a área de cultura xa se traballaba na redacción das bases para convocar a citada praza.
O procedemento anterior para nomear a un director da banda en comisión de servizo fora iniciado durante o anterior mandato, en concreto na xunta de goberno do pasado 13 de marzo. Rubén Arroxo xustificou que se optou por desistir deste proceso despois de que o Concello non recibise a autorización da Xunta para o nomeamento, dado que o funcionario proposto para o posto "viña desa administración". Ademais, recordou que existían informes desfavorables realizados por técnicos municipais e recursos sindicais.
Por outra banda, Arroxo anunciou que se creará unha lista de substitucións para as especialidades da banda e da escola municipal de música.
