A subdelegada do Goberno en nbsp;Lugo,&Isabel Rodríguez, informou de que o Executivo central financiará con 1,2 millóns de euros a construción da nova Oficina de Emprego da cidade no barrio da Residencia, no antigo edificio administrativo do vello Hospital Xeral.
En declaracións aos medios de comunicación, Isabel Rodríguez precisou que esta obra, á que o Goberno de España destinará unha asignación orzamentaria de 1.227.200 euros, é “froito da colaboración entre dúas administracións, a do Estado e a da Comunidade Autónoma”.
De feito, precisou que a “relación” entre ambas as administracións debe “caracterizarse sempre pola lealdade institucional e debe ter como único obxectivo o interese público e a prestación dos mellores servizos á cidadanía”.
Aclarou que o Goberno colabora con este proxecto mediante dúas subvencións con cargo ao chamado Plan Renove, unha por importe de 702.000 euros e outra de 525.000 euros, cando o orzamento total da obra, que a Xunta de Galicia sacou xa a licitación, ascende a 2.565.672 euros.
Ademais, recordou que a nova Oficina de Emprego, onde serán recolocados os servizos públicos da Xunta e do Goberno de España nesta materia, crearase en terreos que son propiedade da Tesourería Xeral da Seguridade Social, que deu todas “as facilidades e axilizou ao máximo os trámites” para facer posible a creación” desta “nova infraestrutura”.
