O Concello de Lugo xa ten encima da mesa o proxecto construtivo da rotonda coa que pretende mellorar a seguridade viaria e a fluidez do tráfico nun dos cruces máis conflitivos da cidade, o da Ronda das Fontiñas coa Rúa San Eufrasio.
Esta é unha infraestrutura necesaria, que atendería unha vella demanda social, cuxa execución resulta relativamente económica. As obras custarían ao redor de 153.000 euros.
Para poder acometer este proxecto o Concello de Lugo precisa que a Xunta de Galicia lle ceda un tramo da travesía de San Eufrasio, que é de titularidade autonómica. Ambas as administracións xa manteñen negociacións desde hai semanas.
O goberno local espera que a cesión se realice unha vez que o Executivo galego leve a cabo as obras de mellora duns tres quilómetros de lonxitude da estrada da Fonsagrada (LU-530), entre a ponte sobre a estación do tren e o acceso á autovía A-6, no barrio de Castelo. A administración autonómica xa as sacou a licitación por uns 334.000 euros.
A consultora que redactou o proxecto construtivo, PK3 Enxeñeiros, advirte de que esta intersección, regulada actualmente por sinais verticais e horizontais de stop e ceda o paso, ten "escasa visibilidade" e que se producen "atascos e retencións, en especial nas horas puntas, dificultando o tráfico, xa de por se complicado da Ronda das Fontiñas".
Ademais de ser constantes as retencións ao longo da xornada neste cruzamento da capital lucense, tamén se adoitan producir accidentes de tráfico con máis frecuencia da desexada.
DESPRÁZASE. A glorieta proxectada, que terá un diámetro exterior de 28 metros e un interior de oito metros, desprazarase cara á ponte sobre a vía do ferrocarril co fin de vencer así o forte pendente da Rúa San Eufrasio, que nalgún punto chega a ser do 12%.
"A rotonda elimina cruces á esquerda, substituíndoos por incorporacións moito máis seguras. A súa implantación aumenta a distancia de visibilidade ao incrementar o desenvolvemento dos eixes dos traxectos", apunta a consultora para xustificar a viabilidade do proxecto e fai fincapé en que se mellora, entre outros aspectos, a fluidez do tráfico ao reducir os tempos de viaxe e "eliminar as colas" que se rexistran actualmente.
