Cando os particulares non poden coller o coche, salvo aqueles que o utilicen para ir traballar en actividades consideradas esenciais, resulta que é cando os prezos do carburante están máis baixos. Catorce estacións de servizo da provincia de Lugo —tres delas sitas na capital lucense— ofrecen o gasóleo A por baixo dun euro o litro.
A gasolineira na que resulta máis económico respostar este tipo de combustible de automoción, a 0,949 euros o litro, atópase en Ribadeo. Son cinco céntimos menos que as tres de Lugo que tamén dispensan este carburante a menos dun euro.
Dúas son as principais causas deste abaratamento, unha é conxuntural, a caída do consumo polo confinamento dos cidadáns, e outra é estratéxica, o pulso que manteñen dous dos principais produtores mundiais, Rusia e Arabia Saudita, no medio da crise global causada pola pandemia do coronavirus.
Hai que remontarse á caída dos prezos que tivo lugar en 2018 para atopar uns importes similares aos que se están rexistrando estes días de urxencia sanitaria.
O prezo da gasolina de 95 octanos tamén está a rexistrar mínimos
HAI TRES SEMANAS. Sen ir máis lonxe, antes de que se declarase o estado de alarma en España o gasóleo A custaba uns 20 céntimos máis. Aínda que entón o seu prezo xa estaba a tender á baixa polo descenso do consumo mundial provocado pola contención en China, que aplicou severas restricións na circulación polo Covid-19.
O prezo da gasolina de 95 octanos tamén está a rexistrar mínimos. Na provincia de Lugo pódese encher a 1,037 euros nunha estación de servizo de Vilalba.
As diferenzas de cinco ou seis céntimos que se rexistran entre unha gasolineira e outra pódese deber a que unhas son de autoservizo e as outras son atendidas, co que estas últimas teñen que facer fronte a maiores aos custos de persoal, o que se acentúa nunha situación como a actual na que o consumo se desplomou en polo menos un 75%.
