O vicepresidente da Xunta, Alfonso Rueda, e o presidente do TSXG, José María Gómez e Díaz-Castroverde, presidiron este mércores a Comisión Mixta de Xustiza, onde acordaron, de xeito unánime, solicitar ao Ministerio de Xustiza a creación de tres Xulgados do Social en Galicia este ano, concretamente, e por esta orde, en Lugo, A Coruña e Vigo. No caso de Lugo trátase dunha vella reivindicación, que en febreiro fora rexeitada polo Goberno.
Tal e como dixo Alfonso Rueda, nestes momentos "é máis necesario que nunca apostar pola xurisdición Social e propor que todos os órganos xudiciais que se vaian a crear en Galicia sexan órganos do Social". Baixo esta premisa, recordou a Xunta, Galicia solicitou xa o ano pasado a creación dun xulgado do Social en Lugo, unha petición que o ministerio "desatendeu inexplicablemente".
Nestes momentos, a xurisdición do Social é "unha das que maior carga de traballo ten", destacou o Goberno galego, "polo que é preciso darlle saída canto antes aos asuntos pendentes e aos que poidan entrar, xa que moitos afectan a miles de familias galegas", como é o caso dos Erte, derivados da pandemia de Covid-19.
Aínda que o Ministerio de Xustiza só asegura a creación dun órgano xudicial en Galicia, a Xunta manifesta o seu desexo de optar a máis se outras comunidades renunciasen. Estes xulgados botarían a andar en canto sexa posible, engadiu Rueda.
CARREIRA PROFESIONAL. Por outra banda, o director xeral de Xustiza, Juan José Martín, asinou este mércores o acordo coas organizacións sindicais SPJ-USO, UXT e CC.OO, que establece o sistema de carreira profesional do persoal da Administración de Xustiza galega.
No mes de maio do 2018, o Goberno galego e organizacións sindicais SPJ-USO, UXT e CC.OO. asinaron un acordo que recollía unha serie de melloras das condicións de traballo do persoal ao servizo da Administración de Xustiza en Galicia, que se iniciaron xa nese momento.
Estas medidas foron
Outra das melloras previstas no acordo era o compromiso da Xunta de articular a implantación dun sistema de carreira profesional que, no marco legal que lles é propio aos funcionarios ao servizo da Administración de Xustiza, permitise aplicar un recoñecemento da súa traxectoria profesional en condicións similares ao do resto de empregados públicos.
PROTESTAS EN VIGO. Finalmente, o sindicato Alternativas dá Xustiza-CUT emitiu un comunicado este mércores no que acusa á Xunta "de negarse a pagar" as prolongacións de xornada realizadas polos traballadores do Xulgado de Violencia de Xénero de Vigo durante o estado de alarma, e que foron "de ata 12 horas".
O sindicato recorda a "inmediatez" coa que se traballa neste xulgado, no que "todo é urxente" e no que "incluso o día da súa entrada, téñense que celebrar os xuízos rápidos que veñen sinalados polas forzas de seguridade. Isto supón, explican, a realización de numerosos trámites que "non poden ser atrasados para o día seguinte".
A "prioridade por lei" da celebración dos xuízos rápidos, "provoca que o traballo do día a día quede sempre nun segundo lugar". "O resto do traballo de diario sae polo voluntarismo e tempo dedicado polos traballadores, unha vez que sae o máis urxente", apuntan, á vez que inciden nos atrasos por falta de persoal e as xornadas "de tarde" que amplían os funcionarios para sacar adiante o traballo.
