Galicia conta con 182 monumentos vexetais, algúns cun valor económico que supera o millón de euros. Este é un dos datos que dará a coñecer o presidente da Asociación Forestal de Galicia, Antonio Rigueiro, nunha nova conferencia que servirá para clausurar as XXXIII Xornadas Luis Asorey. Están organizadas por la Diputación de Lugo y la Real Academia Galega de Ciencias (RAGC), con la colaboración del Campus Terra de la Universidade de Santiago de Compostela.
Así, o salón de actos da sede provincial acollerá este mércores, a partir das sete da tarde, o peche deste ciclo, que incluíu unha serie de conferencias gratuítas. Nesta última charla da edición titulada O capital natural e os servizos ecosistémicos. A nova base da economía, Antonio Rigueiro impartirá unha conferencia que analizará o patrimonio natural "valioso" que representan as "árbores singulares" que hai en Galicia.
144 árbores e 38 formacións
O catedrático, académico numerario da RAGC, explicará que, desde 2007, a comunidade conta co Catálogo de Árbores Senlleiras de Galicia, que inclúe "árbores —son 144 dos 182 elementos— e formacións sobresaíentes e insubstituíbles, que representan un patrimonio natural e cultural importante" a protexer "e poñer en valor". As provincias que achegan máis elementos ao catálogo son A Coruña e Pontevedra.
Son exemplares que teñen tamén unha valoración económica segundo a Norma Granada, o método de valoración de arboredo monumental con máis difusión internacional en lingua española. Este método de tasación económica adquire unha grande importancia ao poder ser empregada en casos de expropiacións, para calcular a repercusión de catástrofes naturais ou para fixar indemnizacións por accidentes de tráfico ou vandalismo.
Os elementos que se teñen en conta para catalogar un exemplar ou formación arbórea son de índole diverso. A súa dendrometría (medidas de dimensións, forma e volume) e lonxevidade é o que máis se ten en conta, aínda que tamén poden influír aspectos culturais e científicos.
Árbores sen prezo e camelias millonarias
Un dos exemplos destacados do catálogo é o carballo de Cartelos en Carballedo, cuxos 35 metros convérteno nun dos máis altos de Galicia e de España, ou un dos eucaliptos máis grandes de Europa, o avó localizado en Viveiro (61,78 metros de altura). Tamén están na lista o castaño de Pumbariños, que está situado en Manzaneda e ten un dos troncos de maior diámetro de Galicia (12,5 metros), e o souto de Catasós, en Lalín, no que crecen os castiñeiros de mellor porte forestal de Europa, segundo técnicos da FAO.
Rigueiro tamén destacará aqueles exemplares con maior valor económico. A camelia, alcumada Pantalóns, do pazo de Lens en Ames está valorada actualmente en 1.608.229 euros, cantidade que a converte no exemplar ornamental máis valioso de Galicia. No apartado de árbores, o castaño de Soutogrande, en Vilariño de Conso, ascende a 758.957 euros.
