Dous funcionarios do servizo de contratación do Concello alertaron desde 2016 ao goberno local en varios correos electrónicos do posible uso irregular dos paneis publicitarios existentes en diferentes puntos da cidade e nas paradas de bus unha vez finalizase en setembro dese ano o contrato coa empresa Clear Channel España.
O PP, que denunciou hai uns días que desde entón a firma utilizou estes paneis e facturou uns 1,7 millóns de euros sen que o Concello percibise nada a cambio, mostrou este mércores aos xornalistas os correos dos funcionarios dirixidos á alcaldesa, o seu xefe de gabinete e a edil de economía, e esixiu a Lara Méndez a súa comparecencia no pleno para dar explicacións de por que "fixo oídos xordos" a estas advertencias.
O portavoz popular, Antonio Ameijide, considera que a alcaldesa non pode alegar descoñecemento do uso fraudulento destes espazos, xa que explica que incluso o xefe de contratación enviou unha providencia á rexedora sete meses antes de que caducase o contrato para avisarlle do vencemento e da necesidade de licitar un novo concurso "con antelación suficiente".
Posteriormente, en febreiro de 2017, o funcionario explica en resposta a preguntas da edil de economía, Ana Prieto, que os paneis xa son de propiedade municipal, porque a empresa tería que habelos retirado no prazo de 60 días desde a caducidade do contrato. Ademais, indicaba que o Concello tiña que velar para que non se fixese un uso fraudulento dos mesmos. Este correo tamén foi remitido ao xefe de gabinete da alcaldía, Óscar da Parte, quen, segundo Ameijide, respondeu que o contrato de publicidade "é un dous que fai cidade e que hai que facer algo bo, pero non explicou nin cando nin como".
O portavoz do PP indicou que en novembro de 2017 e en febreiro de 2018 o xefe e un técnico de contratación volveron alertar da necesidade de controlar estes espazos, porque se estaban cambiando os carteis a pesar de que o contrato caducara. Por iso, cre que a alcaldesa non tiña interese en renovar esta concesión e considera que se está permitindo "un enriquecemento ilícito da empresa coa complicidade do goberno local", concluíu.
