Un curtocircuíto na neveira dun piso da capital lucense mobilizou este martes a Policía Local, bombeiros e ao servizo de Urxencias 061 Galicia, aínda que nin os efectivos antiincendios nin os sanitarios chegaron a intervir no suceso.
A alarma saltou ao redor das oito da tarde, cando o 112 recibiu unha chamada por un presunto incendio nunha vivenda da Ronda das Fontiñas, á altura do número 56. Tanto os bombeiros como a Policía Local desprazáronse de inmediato ata o domicilio, onde comprobaron que había unha cantidade considerable de fume na cociña, aínda que non se produciron chamas, polo que non foi necesario sufocar ningún lume.
Os efectivos comprobaron que o fume procedía da neveira e as primeiras pescudas revelaron que a causa do incidente fora un curtocircuíto no electrodoméstico. O suceso saldouse unicamente con danos materiais nas paredes da cociña, provocados polo fume.
No exterior do inmoble, os axentes da Policía Local tiveron que intervir para regular o tráfico e velar pola seguridade dos viandantes mentres os bombeiros comprobaban o alcance do incidente, que causou algunhas retencións na circulación de vehículos pola avenida.
A intervención dos diferentes servizos de urxencia tamén espertou unha gran expectación na zona, pola que a esa hora da tarde paseaban moitos cidadáns.
