O inmoble abandonado do Carril das Estantigas, próximo ao instituto Xoán Montes e ao canil, que era utilizado como fumadero de heroína -en agosto houbo dúas detencións por venda de drogas- e para celebrar botellóns, será apontoado e retiraranse os elementos que corran o risco de desprenderse. Así se deu a coñecer onte tras a visita que realizaron á casa, a alcaldesa Lara Méndez e o concelleiro de urbanismo, Miguel Couto, con motivo do inicio das obras por parte da propiedade.
Os donos solicitaron a presenza de axentes das policías Local e Nacional para poder comezar as obras en prevención de que se puidesen atopar okupas no interior do local.
Sobre a parte deste inmoble que dá ao Carril das Estantigas, pesa unha orde de execución de obras por parte do Concello, traballos que levará a cabo a propiedade, para que conserven o inmoble nas condicións que "garantan a seguridade, salubridade, accesibilidade universal, e con indicación do prazo de realización", segundo explicou Couto.
Esa decisión, que se debe acometer "de xeito inmediato", adoptouse por mor dos informes presentados pola Policía Local e os servizos técnicos municipais.
As medidas que se adoptarán son para evitar danos na vía pública e nas edificacións anexas. Pero en ningún caso, segundo precisou o edil de urbanismo, permitirase "a execución de obras que requiran a preceptiva licenza, pero se poderá proceder á retirada de elementos susceptibles de desprendemento así como a apontoar a construción".
DEMORA. Outro inmoble ruinoso, o número 48 da Rolda da Muralla, non terá unha solución tan inmediata como anunciara a concellaría de urbanismo. As obras previstas para evitar o desprendemento de cascotes á rúa terá que esperar. O Concello non as poderá executar aínda subsidiariamente e despois revertelas á propiedade, como prevía. Antes terá que solicitar ao xulgado un permiso para que os técnicos poidan entrar no inmoble co fin de comprobar o seu estado para redactar o proxecto.
