Unha comunidade de veciños da rúa Santiago denuncia que leva quince días esperando por un permiso do Concello para unha obra urxente, necesaria para acabar cunhas filtracións que alagan o garaxe e causan danos no edificio.
O problema apareceu hai unhas semanas e recoñecen que nun primeiro momento o Concello reaccionou con rapidez, xa que os técnicos municipais acudiron para facer unha inspección do edificio e determinar a orixe das filtracións de auga. Tras o exame, o equipo concluíu que o problema non estaba en fugas das redes municipais e, xa que logo, foi o seguro da comunidade o que asumiu o traballo de localizar e reparar a avaría.
Con todo, ese labor está bloqueada porque a obra necesita un permiso municipal. "Hai que abrir a rúa e se o facemos sen licenza pódennos multar", explican os veciños, que reclaman que o Concello aplique criterios de urxencia e conceda de forma rápida un permiso para facer unha obra que acabe coas filtracións, que están a ocasionar xa importantes danos no edificio, din, preocupados.
A situación impide usar varias prazas de garaxe, pero máis aló dese contratempo o problema está nos danos que está a sufrir o edificio pola acumulación de humidade durante as semanas que leva manando a auga.
A única solución alternativa á obra, din, non é viable, xa que esixiría cortar a auga quente e a calefacción do edificio.
