LUGO. A cadea de alimentación Froiz abrirá nun mes o seu hipermercado no local que ocupou, ata o pasado mes de febreiro, Carrefour Market, en Montero Ríos. O negocio abrirá en outubro –segundo informou a cadea– e, aínda que non se concretou a data, é posible que sexa antes das festas de San Froilán, dado o alto volume de vendas no sector da alimentación que carrexa esta celebración.
O novo negocio que se instalará alí responderá ao modelo de hipermercado urbano de Froiz e incluirá, entre outras novidades, a preparación diaria e venda de racións de distinto tipo de comida, listas tanto para levar como para comer no propio local.
O Hiper Froiz contará coas tradicionais seccións de produtos frescos como carnicería, charcutería, pescadería, frutería e panadería cos seus respectivos obradores ademais dos espazos dedicados a adega, droguería e alimentación xeral. Tamén haberá amplas zonas destinadas á venda de produtos refrigerados e conxelados.
Esta oferta ao cliente complementarase con outras, máis propias dun hipermercado, como poden ser as dedicadas aos sectores téxtil e fogar, a venda de prensa e revistas e tamén outras seccións como as de electrodomésticos, bazar, enxoval, deporte, fotografía, imaxe e son, automóbil e tamén consolas e videoxogos.
O establecemento contará con horario continuo de luns a sábado e ofrecerá aparcadoiro gratuíto aos seus clientes así como un servizo de envío a domicilio de pedidos.
HISTORIAL. Carrefour Market pechou o pasado 23 de febreiro practicamente dun día para outro, sen aviso previo aos clientes e entre a incerteza dos traballadores que, naquel momento, descoñecían se serían readmitidos por Froiz, a empresa que asumiu o traspaso do negocio.
Clausúraa da tenda de Lugo de Carrefour Market coincidiu co doutras en Ourense e en Logroño. Desde entón, levaron a cabo varios traballos de reforma no interior do local, que se prolongaron durante sete meses, co fin de adaptar as instalacións ao modelo de hipermercados de Froiz.
O peche de Carrefour Market en febreiro foi moi comentado entre os lucenses dado que este negocio constituíu, hai tres décadas, o primeiro supermercado grande que tivo Lugo, aberto baixo a marca comercial de Simago.
En novembro de 1998, pechou Simago pero o supermercado reabriu só tres meses despois baixo o nome de Champion.
Con todo, tampouco esta vez sería a definitiva e o negocio volveu abrir para converterse en Carrefour Market, tamén do mesmo grupo de distribución alimentaria.
