"Foron segundos e non pensei en nada. Entrou no bar, pediume o diñeiro, díxenlle que non llo daba e marchouse sen máis". Con esta sinxeleza conta a súa fazaña unha hostaleira lucense á que non lle tremeu nin un pelo cando un home encapuchado e armado cunha pistola entrou no seu bar o pasado domingo e pediulle o diñeiro. A muller negouse a darllo con tanta rotundidade que o ladrón se deu por vencido á primeira e sen rechistar e marchouse do establecemento de mans baleiras.
A muller, que este luns non paraba de recibir as felicitacións dos seus clientes, restaba importancia ao sucedido sen entender a expectación que espertou a reacción que tivo. "Eu non creo que a cousa sexa para tanto. Foi tan rápido que algúns clientes que estaban no bar nin tan sequera decatáronse do que pasara. Eu, nin sentín medo, nin o deixei de sentir. Será que levo 40 anos detrás da barra", dixo a muller.
O suceso produciuse ao redor das sete e media da tarde do domingo, cando o atracador entrou o bar Open Pool, na rúa Doutor Gasalla, e dirixiuse á barra para esixirlle á propietaria que lle entregase o diñeiro da caixa rexistradora. Nese momento, a muller mirou impasible ao asaltante e díxolle que de ningún xeito llo ía dar. Ademais, pediulle que se marchase do seu negocio inmediatamente.
Ao ver que a muller lle plantaba cara, o home marchouse do establecemento sen conseguir o seu obxectivo e coas mans completamente baleiras.
O intento de atraco quedou gravado polas cámaras de seguridade do establecemento, polo que as imaxes foron recollidas pola Policía Nacional, que abriu unha investigación para identificar canto antes ao encapuchado e intentar evitar que volva actuar na cidade noutro momento.
O home vestía roupa escura, levaba lentes de sol e portaba unha pistola negra, que podería ser falsa. De feito, durante o asalto, sostívoa na man pero non chegou a facer ademán de utilizala. Cando se produciu o suceso, a hostaleira non estaba soa, senón que había bastantes clientes no local, que non daban crédito ao apromo que mostrara a muller.
