Só o 17% dos emprendedores en España son mulleres. Este é outro dos datos que reflicte a brecha de xénero existente no mercado laboral. Así o deu a coñecer este xoves o presidente da Asociación de Jóvenes Emprendedores (Aje) de Lugo, Mauricio Repetto, durante a xornada Mujeres que inspiran en el mundo de la empresa, que organizou este colectivo con motivo do 8-M.
O conselleiro de Economía, Emprego e Industria, Francisco Conde, que participou neste foro, apelou á implicación de toda a sociedade para conseguir a igualdade "real e efectiva", para o que queda, segundo recoñeceu, "moito camiño por diante".
Francisco Conde fixo fincapé en que as emprendedoras representan "a valentía, a iniciativa, a responsabilidade e o afán de superación".
O conselleiro asegurou que "un terzo do emprego xerado no último ano" entre as mulleres concéntrase "en postos técnicos e de alta cualificación".
Recordou que en Galicia unhas 12.000 mulleres ocupan postos de dirección ou xerencia nalgunha empresa e que 482.302 están afiliadas á Seguridade Social, case tantas como homes.
Francisco Conde dixo ademais que as novas tecnoloxías están a abrir "novas oportunidades laborais" e son "un campo de enormes posibilidades para o emprendemento".
EXPERIENCIAS PERSOAIS. Neste foro, organizado para visibilizar e pór en valor o emprendemento feminino na provincia de Lugo, catro mulleres contaron as súas experiencias laborais e os seus proxectos vitais.
Candy Rodríguez, da monfortina Finca el Carmen, dixo que a súa lema é "nunca desistir". Recordou que foi antes veterinaria —a primeira da Ribeira Sacra— que propietaria desta explotación. Tras unha primeira mala experiencia emprendora, agora é "única" en Galicia e "referente" no noroeste peninsular no desenvolvemento persoal e o coaching por medio dos cabalos. Considera que no rural pódese "vivir, investir, innovar e crear emprego".
Chelo Rodríguez, de Leite Quintián do Páramo, pasou de traballar como asesora fiscal a coller en 2006 as rendas co seu marido da explotación familiar. Dous anos despois embarcáronse no proxecto de vender directamente ao consumidor leite pasteurizada envasada. Indicou que, nas reunións profesionais que manteñen, os seus interlocutores adoitan preguntarlle ao seu esposo e non a ela sobre vendas.
Esta gandería paramesa, con medio século de vida, prevé lanzar queixo o próximo verán e aumentar de tres a cinco empregados a finais de ano, todos eles residentes na zona.
Tamén contaron as súas experiencias profesionais María Caridad García Busto, da ulloana Granja Campomayor, e Divina Castelo, da chairega Champivil.
A esta xornada organizada por Aje asistiron tamén, entre outras autoridades, a subdelegada do Goberno en Lugo, Isabel Rodríguez; o delegado territorial da Xunta, José Manuel Balseiro; a directora da Axencia Galega de Innovación (GAIN), Patricia Argerey, e a deputada provincial de promoción económica e social, Sonsoles López Izquierdo.
Esta última recordou a súa dedicación como enxeñeira forestal no medio rural. Dixo que entón non se sentiu agraviada, pero co tempo recoñeceu actos de machismo.
