A reunión celebrada este luns entre a Fiscalía e os avogados dos 17 acusados e as 13 acusacións particulares da operación Pito finalizou con acordo. Tal e como adiantou este diario na súa edición do pasado domingo o pacto evita celebrar a vista oral deste macrosumario iniciado en 2008 para desmantelar unha rede de explotación de traballadores estranxeiros en granxas da provincia, e pecha o caso con condenas mínimas: o principal procesado, para quen se solicitaban 19 anos de prisión, será condenado a dúas, a maior das penas; as sentenzas para os demais será aínda máis baixas e ninguén entrará en prisión.
Nun comunicado feito público este luns pola Fiscalía, na que confirmaba os termos do acordo por El Progreso, esta valora "positivamente este acordo que chegou tras varios meses de negociacións e que poderá evitar a celebración dunha vista oral que podería durar semanas. Recordamos que hai 30 partes acudidas e estaba prevista a declaración de máis dun centenar de persoas".
O ministerio público recoñece que se trata dun "acordo á baixa", pero destaca que "supón que todas as persoas ás que acusaba a Fiscalía serán condenadas en termos razoables, tendo en conta o tempo transcorrido desde que ocorreron os feitos, a gravidade dos seus respectivos comportamentos e o feito de que consignaron cantidades económicas relevantes para reparar o dano causado".
Respecto das vítimas acudidas na causa, a Fiscalía entende que "serán indemnizadas con cantidades que as acusacións particulares consideraron adecuadas e que oscilan entre os 1.000 e os 3.100 euros".
O principal acusado, en rebeldía procesual
Pago de 45.000 euros
O pacto inclúe o pago de 45.000 euros en indemnizacións por parte dos acusados. Os irmáns de Chahihi pagarán 6.000 euros cada un e o principal imputado lucense, 12.000.
