As medidas anunciadas pola Xunta para reducir e afastar a poboación de xabaril da contorna da cidade víronse freadas pola solicitude por parte da Fiscalía dun informe que xustifique e explique as accións previstas. A institución xudicial reclamou este documento á Xunta por mor da denuncia realizada por varios colectivos animalistas.
O último plan anunciado pola Xunta para loitar contra o xabaril pasaba pola instalación de gaiolas para capturar os animais, que logo serían sacrificados. Posteriormente, e se esta medida non dese resultado, consideraríase a posibilidade de realizar unha cacería nocturna con arco.
A finais de febreiro, a Plataforma pola Convivencia Ética coa Fauna Salvaxe, xunto a Anonymous For The Voiceless e Lugo Animal Save, solicitou á Fiscalía que parase a caza dos xabarís. Estes colectivos consideran que a caza e a captura para sacrificio nunha contorna urbana son medidas excepcionais que teñen que estar moi xustificadas e consideran que isto non sucede.
Os opositores apuntaban a necesidade dun informe técnico rigoroso e advertían de que quen autorizase o plan de eliminación do xabaril sen ese documento podería incorrer nun delito de prevaricación.
A Xunta prepara ese documento neste momento, pero a demora na execución do plan podería complicala, xa que as femias xa empezaron a parir. A presenza destes animais salvaxes en terreos e hortas da cidade segue preocupando.