A Fiscalía solicita que sexa deportado un cidadán romanés que presuntamente roubou nunha casa de Lugo obxectos por valor de 3.756 euros, sobre o que xa pesaba unha resolución de expulsión de España por cinco anos ditada pola Subdelegación do Goberno. A vista oral celebrarase nas próximas semanas nos xulgados da capital lucense.
O ministerio público substitúe os dous anos de prisión que solicitaba por un delito de roubo con forza nas cousas pola súa expulsión do país durante cinco anos.
Os feitos tiveron lugar en febreiro do ano pasado nunha vivenda unifamiliar que estaba deshabitada. Tras fracturar a porta de entrada, o acusado presuntamente subtraeu un televisor, un piano eléctrico, un abrigo de visón, tres xogos de candelabros de bronce e unha bicicleta, entre outros efectos.
A compañía de seguros indemnizou aos propietarios con 3.756 euros polos artigos roubados e os danos causados, cantidade que agora reclama ao procesado.
