A Fiscalía pide, inicialmente, oito meses de prisión a un home por un suposto delito de malos tratos cometidos contra a súa parella en novembro de 2019. A sala do Penal 1 de Lugo tiña previsto xulgar este venres estes feitos, polos que o Ministerio Público solicita, ademais da pena de cárcere, a prohibición de aproximarse a menos de 500 metros da vítima e de comunicarse con ela durante dous anos e tamén a privación do dereito á tenencia e porte de armas por outros dous anos.
Segundo Fiscalía, o home deulle unha labazada á súa noiva tras unha discusión. Por mor disto, a muller caeu ao chan sen que conste que se provocou ningunha lesión.
Aínda así, ese mesmo día o xulgado de instrución 3 impuxo ao acusado unha orde de afastamento de 100 metros.
