Na véspera das patronais, a cidade de Lugo recuperará as verbenas mediante un festival organizado pola Xunta de Galicia, coa participación de oito orquestras galegas, que se celebrará este sábado, a partir das 17.00 horas, nos xardíns do Pazo de Feiras e Congresos da cidade.
Esta actividade foi impulsada pola Xunta de Galicia no marco das actividades programadas con motivo da celebración do Xacobeo, para reforzar o apoio a un dos sectores máis castigados pola pandemia e as restricións establecidas para previr os contagios de coronavirus.
Ver máis: O Concello controlará con Policía e seguridade privada o acceso ao feiral
No programa, que foi presentado onte polo delegado territorial da Xunta de Galicia en Lugo, Javier Arias, está prevista a actuación das orquestras Costa Dourada, Arizona, Suavecito, Salsarena, Alma Latina, Lume, Tapyoka e Limón.
O recinto no que se celebrará o festival conta cun aforamento máximo de 1.000 persoas, que poderán estar de pé, aínda que divididas en sectores para garantir a distancia interpersoal e o resto das medidas de seguridade.
Cada unha das orquestras participantes ofrecerá un concerto duns 45 minutos de duración no mesmo escenario, ao aire libre.
A entrada será gratuíta, previa reserva na web www.woutik.es
En todo caso, a Xunta informa de que, se non se esgotan por esa canle, poderán ser retiradas en despacho de billetes, no propio acceso ao recinto.
