Un proxecto do laboratorio de nanoproetómica do Hula, que coordina Cristina Núñez, acaba de recibir 40.000 euros da Xunta, dentro do seu programa de proxectos de excelencia para establecer unidades de investigación competitiva. A investigación ten como obxectivo desenvolver unha ferramenta que poida predicir a que pacientes con cancro de mama her2 positivo lles resultara eficaz o tratamento neoadyuvante, que é aquel que se administra antes da cirurxía.
Núñez explica que para este modelo "utilizaranse distintas técnicas multiómicas e de intelixencia artificial" e implicaranse os servizos de Oncoloxía, Radioloxía, Anatomía Patolóxica, ademais da Universidade da Coruña e o Instituto de Investigación Sanitaria de Santiago de Compostela (Idis) e Centro de Investigación Biomédica en Rede de Enfermidades Raras (Ciberer).
Entre o 15% e o 20% do conxunto de cancros de mama son her2 positivo para os que existen terapias dirixidas
Crearase unha ferramenta que se alimentará con información como resonancias magnéticas das pacientes, mostras de tecido, e análise do soro sanguíneo. O obxectivo é formala para que, co tempo, poida dicir se o tratamento que reciben antes de ser operadas vai ser eficaz ou non.
O her2 positivo supón, segundo o oncólogo do Hula Ignacio Fernández Sobrado, entre o 15 e o 20% dos casos de cancro de mama. Antes da cirurxía adóitaselles administrar ás pacientes inicialmente quimioterapia e, acto seguido, quimioterapia en combinación con dous anticorpos monoclonales. En máis da metade de casos, grazas a esas terapias dirixidas obtense o que se chama unha resposta patolóxica completa: o tumor desaparece, deixa de verse na resonancia.
Iso non evita que as pacientes teñan que ser operadas porque é necesario comprobar que non hai células cancerosas no lugar no que se atopaba o tumor, pero si que mellora o prognóstico. Con todo, hai outro grupo de pacientes nas que non se obtén ese resultado e ata o momento non se sabe cales responderán ben e cales non.
O modelo que se pretende desenvolver desde o Hula aspira a dar resposta a esa pregunta. Con todo, que chegue a bo porto non implicará inicialmente que se prescinda dese tratamento. Seguirase administrando igual mentres non apareza outra alternativa terapéutica, segundo explicou o doutor Fernández Sobrado, pero recoñeceu que sería "un primeiro paso moi importante" saber quen ten unha boa resposta e que pacientes non. No futuro si que pode supor cambios na súa prescrición ou duración.
O 50% deses tumores desaparece despois do tratamento que se dá antes da cirurxía
A investigadora Cristina Núñez destacou a importancia que a axuda pública a este proxecto terá tanto para este como para outros que leva adiante o laboratorio.
Por outra banda, ela recibiu unha prolongación do seu contrato Miguel Servet I, cun Miguel Servet II, que asegura a súa actividade no Hula ata 2026. Os fondos adscritos a ese contrato supoñen o groso daqueles cos que funciona o laboratorio, que tamén conta con outros privados. Entre as liñas de investigación atópase crear unha técnica de diagnóstico non invasiva para o cancro de mama a través de biopsia líquida ou técnicas predictivas para optimizar a administración de inmunoterapia en pacientes con cancro de vexiga e pulmón.
