A caída dunha lousa desde o alto dun edificio de Lugo que causou feridas este mércores a un home levou a unha dotación de bombeiros a retirar outros elementos do inmoble, de tres alturas, que presentaban risco de desprendemento.
O viandante, de mediana idade, resultou ferido ao ser alcanzado pola lousa que caeu sobre a beirarrúa desde o tellado do inmoble número 22 da rúa Marqués de Ombreiro. A pesar do impacto, estivo consciente en todo momento e aparentemente presentaba só feridas de carácter leve, aínda que foi trasladado ao Hula nunha ambulancia do 061 para ser sometido a un exame médico exhaustivo.
O suceso causou unha grande expectación na zona, onde se viviron momentos de temor ante a posibilidade de que puidesen caer máis lousas sobre a beirarrúa e alcanzar outras persoas. Ademais dos servizos sanitarios e dos efectivos de bombeiros, ata o lugar do suceso desprazáronse varias dotacións da Policía Local e da Policía Nacional de Lugo.
