Dous accidentes ocorridos este domingo pola tarde con apenas 15 de minutos de diferenza obrigaron a mobilizar a efectivos da Policía Local e Nacional, aos bombeiros e a varias ambulancias, que trasladaron ao Hula e ao hospital Virxe dos Ollos Grandes aos catro feridos nos sinistros.
O primeiro deles e máis espectacular ocorreu sobre as 16.45 horas na Rolda República Arxentina, á altura do Pavillón Municipal. Un vehículo que circulaba en dirección á rúa Santiago e que conducía unha muller de 52 anos, por circunstancias que se descoñecen, saíuse da vía e caeu polo terraplén ata o carril de subida, onde quedou envorcado.
A condutora, que puido saír polo seu propio pé do coche, foi atendida nunha ambulancia medicalizada que foi mobilizada ata o lugar do accidente e logo foi traslada noutra ata
Pouco despois, ás 17.01 horas, rexistrábase un choque na confluencia das rúas Yáñez Rebolo e Tino Grandío, na Milagrosa, cando un vehículo que circulaba pola primeira das rúas, conducido por un mozo de 23 anos, saltouse o stop e chocou con outro coche no que viaxaba unha parella e que transitaba en dirección á rúa Tui. O sinistro, atendido inicialmente pola Policía Nacional, xa que Atestados do Local estaba no outro accidente, causou tres feridos, que foron trasladados ao hospital Ollos Grandes.
