Unha condutora resultou ferida na tarde deste xoves tras saírse da vía o coche que conducía pola Estrada Vella de Santiago, en dirección á rotonda de acceso á autovía A-56, e chocar con outros dous vehículos que estaban estacionados na zona.
O sinistro rexistrouse sobre as 20.45 horas á altura do cemiterio municipal de San Froilán, xunto a un bar situado nas inmediacións. A condutora, que foi trasladada a un centro sanitario, foi a única ferida.
O accidente resultou moi rechamante ao verse implicados tres coches, que sufriron danos de consideración, sobre todo o da condutora que se saíu da estrada.
Á zona desprazáronse axentes da Policía Local, que se encargaron de levantar atestado do suceso.