A nova escola infantil da rede Galiña Azul en Lugo, construída pola Fundación Amancio Ortega, iniciou a súa actividade este martes cunha xornada de portas abertas á que asistiron as familias que gozarán dalgunha das 82 prazas do centro. O presidente da Xunta de Galicia, Alberto Núñez Feijóo, que inaugurou as instalacións, sinalou que "probablemente non hai mellores escolas infantís en España".
Os usuarios de 0 a 3 anos e os seus pais mesturáronse nas novas instalacións coa comitiva de autoridades na que, ademais do presidente autonómico, estaban o vicepresidente da fundación Amancio Ortega, José Arnau Sierra; a alcaldesa de Lugo, Lara Méndez, e o conselleiro de Política Social, José Manuel Rey. A nova dotación construíuse nos terreos que o Concello de Lugo cedeu en Garabolos, próximos á avenida Paulo Fabio. A fundación Amancio Ortega ocupouse da edificación e a xestión levaraa o Consorcio de Galego de Servizos de Igualdade e Benestar.
