"Moita xente necesita carne nestes momentos tan complicados". Así explicaba Francisco López, presidente da Federación de Caza, a decisión de entregar a Cáritas quince xabarís.
A carne, xa completamente preparada e envasada ao baleiro pola sala de despezamento da Fonsagrada, entregouse este venres na sede de Cáritas. O presidente da organización, Ginés Plaza, detallou que o alimento se distribuíu este mesmo venres entre familias necesitadas, que o acolleron "de marabilla".
É a primeira vez que a Federación de Caza fai unha doazón de carne con fins solidarios, pero López asegura que non será a última, porque o colectivo é consciente de que hai moitas necesidades.
"Con esta primeira entrega tamén queremos dar exemplo, para que as peñas de cazadores de Lugo se animen a entregar carne para a xente que necesita ese alimento", aseguraba López.
Ademais de haber necesidade en tempos de crises, moitos cazadores están en disposición de entregar parte das súas pezas, porque nestes momentos hai moito xabaril no monte, dicía López.
En tanto, Plaza sinalaba que os arredor de 230 quilos de carne recibidos este venres supoñen unha achega importante, "porque hai moita xente necesitada". Engadía que "todo é pouco para a cantidade de xente que necesita axuda".
Cáritas, que como outras organizacións solidarias está a ver como sobe o número de lucenses que necesitan da solidariedade, asegura que as familias reciben con alivio as achegas que se lles poden facer.
En Nadal Cáritas recibiu comidas do programa solidario de José Andrés, outra repartición que tivo grande acollida, destacou.
