O primeiro paciente diagnosticado de covid-19 na provincia de Lugo, un veciño de Foz de 60 anos, continúa ingresado na unidade de infecciosas do Hula e segue clinicamente estable. Mentres permanece hospitalizado, os preventivistas xa estableceron a necesidade de gardar corentena en casa a algúns dos seus familiares e parte do persoal sanitario que estivo en contacto con el no hospital de Burela.
Trátase en concreto dos profesionais que o atenderon en Urxencias, onde chegou o pasado domingo con síntomas respiratorios porque, unha vez que se viu que se debían a unha pneumonía vírica, foi enseguida ingresado de forma illada nunha habitación do centro mariñán e todo o persoal que o tratou a partir de entón fíxoo coas mesmas precaucións que se utilizan para un caso confirmado de coronavirus. O traslado e o manexo do caso no Hula tamén se fixo con todas as medidas de seguridade.
O paciente deu positivo na primeira proba, pero aínda está pendente dos resultados da segunda.
Os sanitarios que deben permanecer nas súas casas son sete e, na mesma situación, atópanse dous familiares do home, de 60 anos, que podería ter entrado en contacto co virus tras facer unha viaxe a Madrid en entroido para visitar uns familiares.
A corentena domiciliaria será de 14 días, período no que os afectados deben observar medidas preventivas tamén dentro dos seus fogares.
