Cada mes preséntanse entre tres e catro denuncias de media na provincia de Lugo por agresións, físicas ou verbais, a persoal sanitario en centros de saúde ou hospitais, segundo os datos do sindicato Satse. A última que transcendeu foi a sufrida por un enfermeiro que recibiu labazadas de dous familiares dun menor ao que estaba a atender no servizo de urxencias pediátricas do hospital Lucus Augusti. A Policía Nacional investiga o caso.
O altercado produciuse cando o sanitario examinaba o neno, de 11 anos de idade, na triaxe de urxencias para valorar a gravidade da súa doenza. Tras pedirlles ao menor e aos seus pais que pasasen á sala de espera ata que os avisasen para que fose atendido por un pediatra, apiñáronse de súpeto na estancia uns 20 achegados do paciente, que esixían que o asistisen inmediatamente. Dous deles golpearon o enfermeiro.
Os vixiantes de seguridade evitaron que o incidente fose a máis. Ademais, ás portas de urxencias concentráronse outras 20 ou 30 persoas, que se achegaron ata alí porque estaban a acompañar a un familiar ingresado no hospital.
A vítima presentou denuncia na Policía Nacional, pero non puido identificar os seus agresores debido ao tumulto que se formou.
Se as forzas da orde conseguen localizar os dous autores, estes poderíanse enfrontar a unha solicitude de condena de prisión, xa que desde hai catro anos as agresións a funcionarios públicos de sanidade e educación están equiparadas aos delitos de atentado contra axentes da autoridade, o que pode carrexar ata catro anos de cárcere.
A vítima presentou unha denuncia na comisaría da Policía Nacional, pero non puido identificar os seus agresores
MEDIDAS A ACOMETER. Satse formula unha batería de propostas para poñer coto a este problema, que asegura que cada día se agrava máis. Unha desas demandas é que en cada centro de traballo se elabore un plan de prevención coas medidas a implantar para "evitar ou diminuír o risco de sufrir agresións". Propón ademais que se leven a cabo campañas de sensibilización para "concienciar a administracións, profesionais e cidadáns sobre a necesidade de traballar conxuntamente para acabar coa violencia".
42 DENUNCIAS NA PROVINCIA. O ano pasado presentáronse 42 denuncias na provincia de Lugo por agresións físicas ou verbais a persoal sanitario, 22 en hospitais e o resto en Atención Primaria. Na Coruña foron 210, en Pontevedra 184 e en Ourense 33, segundo os datos de Satse.
Pero eses casos distan moito da realidade. Segundo este sindicato, "só se denuncian o 11 por cento das agresións sufridas".
Un vixiante tivo que coller a baixa tras ser agredido por detrás. A outro, un ingresado en Psiquiatría mordeulle na man e un terceiro recibiu un golpe na cabeza cando mediou cun paciente que ameazou a un médico porque lle acababa de dar o alta no servizo de Urxencias.
Ante a escalada de incidentes sufridos polos vixiantes de seguridade nos hospitais galegos —UXT cifra entre tres e cinco diarias no Hula, entre leves, graves e moi graves—, este sindicato solicitou á Consellería de Sanidade, coa que mantivo reunións nos últimos dous meses, que lles facilite máis medios de protección, como chalecos antitrauma, luvas anticorte e xeles de pementa.
Máis dunha trintena de vixiantes de seguridade do Hula e os seus compañeiros dos hospitais de Burela e Monforte están a recibir cursos de formación para elaborar partes de incidencia, a través dunha APP.
O persoal de seguridade de UXT tamén airea outros problemas no Hula, como o masivo estacionamento indebido de vehículos na explanada de urxencias.
