Miércoles. 14.11.2018 |
El tiempo
Miércoles. 14.11.2018
El tiempo

A familia de patos do Parque crece ao criar por primeira vez en cinco anos

Patos no estanque do parque Rosalía de Castro. VITORIA RODRÍGUEZ
Patos no estanque do parque Rosalía de Castro. VITORIA RODRÍGUEZ

Inicialmente había cinco pitos, aínda que desde hai algúns días só se ven catro

O estanque dos patos do parque Rosalía de Castro é sempre un espectáculo para os nenos pequenos, pero desde hai unhas semanas máis porque a familia creceu. As aves lograron criar por primeira vez desde que en 2013 foron levadas a ese espazo. Inicialmente había cinco pitos, aínda que desde hai algúns días só se ven catro.

Do coidado destas aves ocúpase persoal de Calfensa -empresa que mantén a maior parte dos parques e xardíns da cidade-, que se responsabiliza de abrir aos animais pola mañá e de gardalos pola noite, así como de darlles para comer e de renovar a auga do estanque.

As aves foron doadas en 2013 polo parque ornitolóxico Avifauna, de Outeiro de Rei. Nese momento foron trasladados ao Parque 18 exemplares de tarro canelo, tarro branco, pato peposaca, pato carolina, silbón europeo, ánade real, cerceta pardilla e ánade de pico amarelo. Eran individuos adultos nacidos en catividade nas instalacións do parque zoológico que foron entregados anelados e desparasitados.

Os animais eran moi esperados por moitos cidadáns, sobre todo por familias con nenos pequenos, xa que o estanque estivo tres anos baleiro, a consecuencia das obras de mellora realizadas no Parque. Para levalas a cabo, as aves que había antes foron trasladadas ao recinto que ten a Deputación nas ladeiras do parque do Rato, onde, segundo informou entón o Concello, serviron de alimento aos raposos. Ante esa situación e a demanda cidadá para que os patos volvesen ao Parque, o Concello chegou a un acordo con Avifauna, quen os doou e durante un tempo ocupouse deles, ata que o Concello decidiu que o fixese Calfensa.

RANDEEIRAS. O Concello tamén informou de que xa contactou coa empresa que se encarga do mantemento das áreas de xogo infantís para que repoña dúas randeeiras no parque Rosalía de Castro. A administración local cre que a súa desaparición está vinculada ás concentracións de mozos que se producen algunhas noites no Parque para facer botellón.

A empresa tamén reporá un xogo no barrio Feixoo, que foi retirado porque estaba deteriorado, segundo informou o goberno local.

A familia de patos do Parque crece ao criar por primeira vez en...
Comentarios