O cadro Fame en Lugo, do pintor lucense Jesús Rodríguez Corredoria, foi cedido este luns ao Museo Provincial despois de que se asinase o documento polo que se doa "gratuitamente" esta obra da familia do mecenas Álvaro Gil.
Na firma, o neto de Álvaro Gil Carlos López Gil e o presidente da Deputación de Lugo, Darío Campos, subscribiron este luns esta doazón.
Carlos López destacou que a idea do donativo fora da "súa nai" e que el se limitou a elixir o cadro, obra que se sitúa a principios do século XX, sobre 1910. En palabras de Campos, describe "a tristeza e a amargura dun pobo" e obsérvase unha das pautas que marcaron a obra deste autor "a influencia de Zuluoaga e do Greco", abundou.
Carlos López Gil puntualizou que "mentres o cadro estea exposto, permanecerá en Lugo de forma indefinida e se ten que ser apartado para calquera restauración ou mantemento ou se vai a outro museo temporalmente para ser visto", estarán "encantados da vida", destacou.
Así mesmo, puntualizou que a obra "non se doa para que estea gardada ou nunhas dependencias que non sexan abertas ao público". "Cúmprese un obxectivo para nós, que é que este cadro volvese, que poida ser visitado por aqueles que aprecien a Corredoira e este tipo de obras", concluíu.
O presidente da Deputación resaltou que Corredoira é "un artista lucense e pola súa relevancia ten sala propia e este cadro Fame en Lugo pasará a estar instalada na súa sala".
"VOLVE A LUGO". "Corredoira volve a Lugo. Nestes momentos o museo conta con máis de 30 obras de Corredoira e con esta doazón contribuímos a pór en valor aos artistas lucenses e a nosa cultura", sinalou antes de agradecer este novo "acto de xenerosidade" da familia de Álvaro Gil.
Recentemente cedeuse tamén ao Museo Provincial o Torques de Burela, o maior dos colares de ourivaría castrexa achados en Galicia, que era patrimonio do filántropo lucense e que agora se expón na Pinacoteca provincial de Lugo.