Subtraeu unha valiosa colección de reloxos hai un ano nunha vivenda da capital lucense e deuse á fuga. O home, que o luns non se presentou ao xuízo, foi identificado, pero permanece desaparecido dende entón e o seu avogado non conseguiu localizalo, nin no domicilio que figura na súa documentación, nin tan sequera a través dos seus familiares.
Tanto o seu letrado como o fiscal solicitaron o luns que se aprazase a vista e o xuíz decretou a suspensión, sinalando un novo xuízo para o 29 de novembro. O maxistrado advertiu que, se de novo non se presenta, ditará unha orde para que sexa detido e trasladado aos xulgados polas forzas e corpos de seguridade.
O fiscal mantén que o acusado, con iniciais A.C.P., presentouse nunha vivenda da capital lucense o 22 de abril de 2016 e explicou aos seus propietarios que era traballador dunha compañía de subministración eléctrica e que tiña que revisar a súa instalación. O home ía acompañado doutra persoa —que non chegou a ser identificada— e os donos da casa deixáronos entrar.
O xuíz fixou un novo xuízo para o 29 de novembro e, se non presenta, porao en busca e captura. O fiscal pide ano e medio de cárcere
BOTÍN. Unha vez dentro, un dos acusados distraeu á familia, mentres o outro se apropiaba de todos os artigos de valor que atopaba ao seu paso. Segundo quedou recollido na denuncia, o acusado e o seu cómplice apoderáronse dun sobre con 1.200 euros en efectivo, así como dunha colección de 27 reloxos, entre os que había dous da marca Ferrari, un Breil, un Mercedes e un da marca Tag Heuer, que foi valorado en 1.025 euros.
O presunto ladrón foi identificado e o ministerio público acúsao dun delito de furto, tipificado no artigo 234 do Código Penal. A Fiscalía solicita para o home unha condena de ano e medio de cárcere.
O ministerio público pide tamén que o home indemnice aos propietarios dos reloxos na cantidade que determine o xuíz polos artigos roubados que non foron recuperados, entre eles o Tag Heuer, xa que algúns dos reloxos xa foron localizados pola Policía Nacional e devoltos aos seus donos.
