O neno de 14 anos que sufriu un accidente de tráfico o xoves da semana pasada na circunvalación da Nacional VI, ao seu paso pola capital lucense, faleceu este mércores na Unidade de Coidados Intensivos do Hospital Lucus Augusti (Hula), na que permanecía ingresado. O instituto no que estudaba, o Leiras Pulpeiro, homenaxeouno este xoves.
A capela ardente do menor, Raúl Gómez Varela, instálase este xoves no velorio Campomayor de Palas de Rei, desde onde está previsto que se realice este venres a condución do cadáver, ás 16.30 horas, cara á igrexa parroquial de Santo Xusto da Repostería, na que se vai a oficiar o enterro.
A nai do menor é natural de Santo Xusto da Repostería e o pai da parroquia tamén palense de Orosa. A familia leva anos residindo en Lugo, onde o proxenitor traballa nunha empresa de transporte urxente de paquetería.
Raúl Gómez cursaba segundo de secundaria no instituto Leiras Pulpeiro da capital lucense, onde tamén estudara o seu irmán. Os alumnos e profesores deste centro docente gardaron este mediodía un minuto de silencio en homenaxe póstuma ao seu compañeiro.
As mostras de pesar pola perda deste estudante de 14 anos sucédense a través das redes sociais, unha vez que se coñeceu á primeira hora da tarde o fatal desenlace.
HAI UNHA SEMANA. O sinistro tivo lugar ás once da noite do pasado xoves, no tramo entre As Saamasas e Garabolos, cando o turismo no que viaxaba o menor, que conducía o seu irmán de 18 anos, chocou frontalmente contra outro.
O irmán do falecido e a condutora do outro vehículo, de 37 anos, resultaron feridos leves e tamén foron evacuados en ambulancia a centros sanitarios.
O menor tivo que ser excarcerado polos bombeiros de entre os ferros do turismo no que viaxaba, debido á brutal colisión.
O sinistro que se produciu hai unha semana reabriu o debate público sobre se se debe desdobrar esta variante e instalar unha mediana para contribuír a que se mellore a seguridade viaria.
Colisión múltiple
Tres semanas antes, o pasado 21 de novembro, rexistrouse unha colisión múltiple a 100 metros de onde tivo lugar o accidente do xoves da semana pasada, á altura do cruzamento da N-VI coa pista que conduce a unha empresa de conxelados e ao colexio Galén. Nese tamén habían resultado feridas tres persoas, unha das cales tivo que ser excarcerada polos bombeiros do vehículo que conducía.
