Marcos Fernández Trigo fala con coñecemento de causa cando cita as pedras que ateigan o camiño do colectivo LGTB, que engloba as persoas lesbianas, gais, bisexuais e transxénero. A súa loita por defender os dereitos destes sectores non pasou desapercibida en Lugo, onde preside a Asociación pola Liberdade Afectivo-Sexual (Alas), na que escoita e asesora outros lucenses que viven situacións complicadas polo simple feito de non sentirse identificados coa heterosexualidad. Na súa opinión, a sociedade cambiou moito nas dúas últimas décadas, e non precisamente para mellor.
"Neste terreo houbo unha involución clara. Hai 20 anos, en Lugo ninguén se viraba pola rúa cando vía a dous mozos ou a dúas mozas da man, pero agora si. Eu en 2001 paseaba tranquilamente agarrado á miña parella pola Praza Maior e ninguén me insultaba, pero agora os gais e as lesbianas teñen que aguantar malas miradas e palabras ofensivas. É incrible, pero en lugar de avanzar, retrocedemos", apunta.
Para Marcos Fernández, a situación en Lugo é un reflexo do que pasa no resto do país e do mundo. "Hai unha onda de homofobia moi preocupante en todas partes, e sobre todo entre a xente nova. Aquí en Lugo están a darse cada vez máis casos entre adolescentes e na asociación xa temos constancia de varias agresións físicas, consistentes en patadas ou puñadas. Non foron lesións graves, pero este tipo de ataques, do mesmo xeito que ocorre coa violencia de xénero, sempre empezan con pequenas cousas: un insulto, un empuxón... pero poden acabar moi mal, por iso hai que cortalas de raíz".
O presidente de Alas Lugo anima ás vítimas a denunciar, aínda que entende que non é fácil. "É moi complicado presentarse nunha comisaría de Policía para denunciar que alguén che deu un empuxón por ser gai. E ata as propias vítimas adóitanlle restar importancia. Algúns pensan que non lles van a facer caso e que non servirá de nada, outros senten vergoña ou medo a ser cuestionados, e tamén hai quen o deixa pasar porque non conta co apoio da súa familia. Por diferentes motivos", sinala, "a realidade é que soamente se denuncian entre un 5 e un 10% dos casos".
ORIXE. Este incremento da homofobia é cada vez máis patente e o colectivo LGTB ten clara a súa orixe. "Para nós é obvio que esta situación ten que ver coa irrupción dos partidos de ultradereita, como Vox, na escena política. O seu discurso de odio ampara este tipo de condutas e hai un sector da sociedade —que antes non se atrevía a insultar ou a agredir a un gai ou a un estranxeiro— que agora sente amparado por estes partidos. A xente nova xa é de seu rebelde e é moi perigoso que cale entre eles o discurso do odio, xa que se retroalimentan uns a outros e a violencia só xera violencia".
Este xiro na sociedade non pasa desapercibido en Lugo. "Cada vez nos chamans máis mozos gais e mozas lesbianas para pedirnos consello e contarnos as súas preocupacións, pero tamén nos chaman moitas nais que sofren polos seus fillos. Explícannos que non foron vítimas de insultos nin de agresións, pero elas ven como están as cousas e teñen medo; anticípanse aos problemas", di.
Marcos Fernández considera que a solución a esta problemática pasaría, por unha banda, por endurecer as penas para os delitos de odio e impedir calquera discurso que puidese incitar a estas condutas, e por outro, por educar na diversidade. "Mentres non se lles fale aos nenos con naturalidade das persoas lesbianas, gais, bisexuais e transgénero, seguirá sendo un tema tabú. Queda moito traballo", conclúe.
