Vaia sorpresa levou hai uns días unha usuaria do aparcadoiro público do Hula cando ao meter o billete no parquímetro para pagar polo estacionamento do seu vehículo atopouse con que a factura ascendía nin máis nin menos que a 77.956 euros.
A afectada, que escoitara que a nova concesionaria rebaixara substancialmente os prezos, fregou os ollos para comprobar que non lle fallaba a vista e que a conta ascendía a cinco díxitos.
A condutora só permanecera ao redor dunha hora no aparcadoiro para acudir a unha consulta, pero, segundo reflectía a pantalla da máquina, tivo aparcado o seu vehículo durante máis de 53 anos, desde a madrugada de Ano Novo de 1970.
O parquímetro atribuíalle en concreto que non movera o seu vehículo durante 19.488 días, 14 horas e 34 minutos, o que supuña un gasto de catro euros de media por día. E iso que o aparcadoiro do Hula abriu as súas portas en xaneiro de 2011, 41 anos despois de que esta usuaria xa estacionase alí supostamente o seu coche.
A máquina dáballe a posibilidade á afectada de saldar esa conta de 77.956 euros ben en efectivo, con moedas de entre cinco céntimos e dous euros e con billetes de 5 a 50 euros, ben con cartón de crédito.
Ao final a usuaria só tivo que desembolsar 0,70 euros pola hora en que tivo estacionado o seu vehículo no aparcadoiro do hospital, 100.000 veces menos do que a errática máquina pretendía cobrar.
