A facultade de Veterinaria afronta esta semana a visita da comisión internacional que examinará o centro a fondo con vistas a renovar a acreditación europea que ostenta desde 2002 e que xa revalidou en 2008. Para este proceso, sete especialistas veterinarios vinculados á Asociación Europea de Establecementos de Formación Veterinaria (EAEVE, nas súas siglas en inglés) desprazáronse a Lugo e manteñen unha apertada axenda de entrevistas e visitas que finalizarán este xoves.
A comisión está coordinada polo director do Sistema Europeo de Avaliación da Formación Veterinaria (Esevt), o belga Pierre Lekeux. Tamén forman parte deste comité externo Yngvild Wasteson, especialista noruegués en hixiene e inspección de alimentos que actuará como presidente da comisión; Mario Baratta. experto italiano en ciencias básicas; Florian Buchner, austríaco especialista en animais de compañía; David Barrett, experto británico en produción e sanidade animal; Cristophe Buhot, especialista francés en medicamento de grandes animais, que actúa como representante da Federación de Veterinarios de Europa; o finlandés Mirja Ruohoniemi, especialista en control de calidade e a austríaca Vitoria Drauch, en representación do colectivo estudantil.
A facultade de Veterinaria xa lles enviou o pasado mes de xullo unha autoavaliación, un informe previo cos datos do centro relativos a todas as categorías que se someten a escrutinio: organización, finanzas, plan de estudos, infraestruturas e equipamento, recursos animais, recursos docentes, admisión e atención ao alumnado, sistemas de avaliación; persoal docente e de administración e servizos, investigación, programas de formación continúa e posgrao e sistemas de garantía interna de calidade.
Agora, os membros da comisión comprobarán e supervisarán a veracidade da información a través da consulta de documentación e de entrevistas con representantes de todos os colectivos, desde profesorado, persoal administrativo e alumnos ata clínicas externas que acollen estudantes en formación.
Neste programa, tamén hai espazo para relaciónelas institucións e está previsto que a comisión sexa recibida este mércores pola tarde, ás 20.00 horas, en Pazo de San Marcos de Lugo, polo presidente da Deputación, nun acto no que tamén participarán outras autoridades e representantes da profesión veterinaria.
